გონიო

გონიო

გონიო-ბათუმიდან 12 კმ-ში, საქართველო-თურქეთის საზღვართან და მდინარე ჭოროხთან ახლოს მდებარე დაბაა. გონიოში პლაჟები ფართო და მოსახერხებელია, იქვეა პრომენადები და სასეირნო ბილიკები. გონიო-კვარიათში საკურორტო ზონის შესაფერისი, კარგად გამართული ინფრასტრუქტურაა. სანაპიროები კეთილმოწყობილია. მრავლადაა კაფეები, ბარები და მაღაზიები. ბოლო წლებში აქ უამრავი სასტუმრო და ჰოსტელი აშენდა, ასევე ბევრი ვილის ტიპის სახლია, რომელთაგან უმრავლესობა ზღვის ნაპირთან საკმაოდ ახლოს მდებარეობს და საუკეთესო ხედებით გამოირჩევა, ზოგი მათგანი კი ფერდობებზეა გაშენებული.

გონიოში ზღვის წყალი განსაკუთრებულად სუფთა და კამკამაა, პლაჟები ძალიან ახლოსაა მთებთან, რაც დადებით გავლენას ახდენს მიკროკლიმატზე და აქ დასვენებას ესთეტიკურადაც სასიამოვნოს ხდის.

საქართველოს ერთ-ერთი მთავარი ისტორიული ღირსშესანიშნაობა გონიო-აფსაროსის ციხეც ზუსტად აქ მდებარეობს, სადაც შეგიძლიათ მოინახულოთ მუზეუმი და შეიტყოთ ბევრი ამ ადგილების ისტორიის შესახებ.