ქობულეთი

ქობულეთი

ქობულეთი აჭარის შავიზღვისპირეთის ერთ-ერთი მთავარი ქალაქია, რომელიც შავი ზღვის აღმოსავლეთ სანაპიროზე, ბათუმიდან 20 კმ-ის დაშორებით, სუბტროპიკული კლიმატის ზონაში მდებარეობს. მისი 10 კმ-იანი სანაპირო ზოლი საკმაოდ გაშლილი ქვიშა-კენჭოვანი პლაჟებისგან შედგება. აქ ზამთარში ტემპერატურა იშვიათად ჩამოდის +5 °C-ზე ქვემოთ, ზაფხულში კი +25°C /+30°C ფარგლებში მერყეობს, ზღვა 27°C -მდე თბება.

ქობულეთის სანაპიროს გასწვრივ გაშენებული ფიჭვნარი ზღვის იონიზებულ ჰაერს კიდევ უფრო სასარგებლოს ხდის. ზაფხულის სიცხეში ფიჭვების ჩრდილში დაისვენებთ ან მთელ დღეს ოჯახთან ერთად მყუდროდ გაატარებთ.

ქობულეთი პატარა ქალაქია და ნებისმიერი წერტილიდან ზღვაზე რამდენიმე წუთში მოხვდებით. ქალაქში ყველა კატეგორიის სასტუმროს იპოვით. აქ უხვად არის კაფეები, რესტორნები, ბარები და ღამის კლუბები. ცალკე აღნიშვნის ღირსია ქალაქის პარკი, რომელიც ზღვის სანაპირომდე გრძელდება. მრავალწლოვანი ფიჭვნარი აქ განსაკუთრებულ მიკროკლიმატს ქმნის და კარგი დასვენებისკენ განგაწყობს.

ქობულეთთან ახლოს მდებარეობს ისტორიულ-არქელოგიური კომპლექსი პეტრას ციხე (VI საუკუნე), დაცული ეროვნული პარკები: ქობულეთის დაცული ტერიტორია, ისპანის ტორფნარი, მტირლას ეროვნული პარკი, კინტრიშის ეროვნული პარკი.

ქობულეთის მუნიციპალიტეტიდან სულ რაღაც 12 კმ-ში მდებარეობს გასართობი ცენტრი „ციცინათელა“.